Catullus

Korb_Cat34_Latin112_2013

Catullus’ hymn to Diana represents a welcome change of pace to his love poetry and invectives, argues Matthew Korb. Catullus 34 discussed and read aloud by Matthew Korb.

Orazio Gentileschi, Diane the Huntress, (ca. 1640) Musée des Beaux-Arts de Nantes. Photo: Henry Townsend, Wikimedia Commons.

Dianae sumus in fide

puellae et pueri integri:

Dianam pueri integri

puellaeque canamus.

O Latonia, maximi

magna progenies Iovis,

quam mater prope Deliam

deposivit olivam,

montium domina ut fores

silvarumque virentium

saltuumque reconditorum

amniumque sonantum:

tu Lucina dolentibus

Iuno dicta puerperis,

tu potens Trivia et notho es

dicta lumine Luna.

Tu cursu, dea, menstruo

metiens iter annuum,

rustica agricolae bonis

tecta frugibus exples.

Sis quocumque tibi placet

sancta nomine, Romulique,

antique ut solita es, bona

sospites ope gentem.